కాకతి రాణి రుద్రమ- శిల్పి రామప్ప మధ్య ప్రేమాయణం?!

కాకతీయుల పౌరుషాగ్ని రాణిరుద్రమ రామప్పను ప్రేమించిందా? అంత గొప్ప పరాక్రమశాలి ఒక శిల్పకారుడిని ఎందుకు ఆరాధించింది? యువరాణి మనసు దోచిన రామప్పతో వివాహం ఎందుకు జరగలేదు!  

1260. రాణి రుద్రమ వివాహం, పట్టాభిషేకం జరిగిన సంవత్సరం! అంతకుముందే రాణి రుద్రమ ఒక యువరాజుగానే చలామణి అయ్యేది! మగ వేషధారణలోనే తిరిగేది! ఆమెను జనం కూడా “రుద్రమ మహారాజువారు” అనే పిలిచేవారు! యువరాజు హోదాలోనే అనేక రాజ్యాలు తిరుగుతున్న సందర్భంలో బేలూరు చెన్నకేశవలాయాన్ని చూసి ముచ్చట పడుతుంది! తన రాజ్యంలో కూడా అలాంటి గుడి కట్టాలని తండ్రి గణపతికి చెబుతుంది! కాకపోతే ఆ గుడిపై శిల్ప భంగిమలు తనవే ఉండాలని కోరుకుంటుంది! సరేనన్న తండ్రి రామప్ప అనే శిల్పిని పిలిపించి గుడి గురించి వివరిస్తాడు! కాకపోతే స్తంభాల మీద, గోడల మీద చెక్కే శిల్పాలు తన కూతురు రుద్రమవే ఉండాలని ఆజ్ఞాపిస్తాడు! అప్పుడే రామప్పకు సందేహం వచ్చింది! చూస్తే మగరాయుడిలా ఉంది.. ఈమెకు నాట్యం కూడా తెలుసా అని!?  అయితే రామప్ప సందేహం పటాపంచలు కావడానికి ఎంతో సమయం పట్టలేదు. రుద్రమ బాడీ లాంగ్వేజీలో ఎంత రౌద్రరసం తొణికిసలాడినా.. నాట్యం చేసే సమయంలో ఆమె రూపం ముగ్ద మనోహరంగా మారిపోతుంది. అలా మగవేషాన్ని వీడి సహజ సౌందర్యంతో నాట్యం ఆడుతుంటే రామప్ప కనురెప్ప వాల్చలేదు. ఆమె ఆడుతున్నంత సేపు స్థాణువులా నిలిచిపోయాడు. రుద్రమ భంగిమలన్నీ ఒక్కొక్కటిగా రామప్ప మస్థిష్కంలో స్నాప్‌షాట్ లాగా మిగిలిపోయాయి. వాటినే రామప్ప శిల్పాలుగా మార్చాడనే జానపద గాథ ఒకటి ప్రచారంలో ఉంది! ఈ సందర్భంలోనే రామప్పకు, రాణి రుద్రమకు మధ్య ప్రేమ చిగురించినట్లు చాలా కథలు, నవలలు, పుస్తకాలు వచ్చాయి. మల్లాది వసుంధర లాంటి ప్రముఖ కవయిత్రులు కూడా ఇదే ఇతివృత్తంతో నవలలు రాశారు. ఈ కథలో చివరికి రామప్ప నుంచి రాణి రుద్రమను వేరుచేస్తారు. తర్వాత రామప్ప వేదనతో చనిపోతాడు. దీంతో ఆ రుద్రేశ్వరాలయానికి రామప్ప పేరు పెడతారు. అయితే ఈ కథకు చారిత్రక ఆధారాలు లేవు. రాణి రుద్రమను వీర వనితగానే చూడడానికి జనం ఇష్టపడతారు. కాపోతే కథకు బలం చేకూర్చడం కోసం చేసిన ప్రయోగం ఇది. అయితే ఆ కథల్లో రుద్రమ వ్యక్తిత్వం కంటే రామప్ప వ్యక్తిత్వమే ప్రకాశిస్తుంది. ఇదంతా అవునని అనలేం. అలాగని కాదనీ చెప్పలేం!  కాకపోతే రాణిరుద్రమ ప్రేమలో పడిందంటే వినడానికి కొంత ఆశ్చర్యంగా ఇంకొంత యాంగ్జయిటీగా ఉంది.