తాటివైన్‌ తాగిన తాజా అనుభూతి

తాటివైన్‌ తాగిన తాజా అనుభూతి
ఆత్మ ఎప్పటికప్పుడు రిఫ్రెషింగ్
పాటల క్రూరత్వంలో ఇంద్రియాల ఉపశమనం
మిర్రర్‌ క్లౌడ్ మీద సిల్వర్‌ పూత
రిలెంట్‌లెస్‌ డాన్స్ విత్ డాఫొడిల్స్
మెట్టతామర పూలతో గాఢాలింగన చుంబనం
చుట్టూ కొండగాలుల ఘాటు పరిమళం
ఎక్స్ బ్లాస్ట్‌ స్కోర్‌ 1157 అయితే ఏంటి

చీకటి సముద్రంలో తప్పిపోయిన నావికుడి సాహిత్యం
ఆండీస్‌ పర్వత శ్రేణుల్లో ఎకోలై ప్రకంపిస్తోంది
ఒంటరి మేఘమై తీరం పక్కన తచ్చాడుతుంటే
ఒక భయంకరమైన 21వ శతాబ్దపు అర్ధరాత్రి
వాడిపోయిన గులాబీ పువ్వై ఏడ్చింది

ముసురు పట్టిన అసుర సంధ్యవేళ
బ్రాందీ సీసాల మూతలు తీసే టైం
ఎవ్రీ లైన్‌ విల్ బీ కంపోజ్డ్‌ ఇన్‌ సింఫొనీ
ఒక ఇన్‌ఫీరియర్ పోయెట్‌గాడెవడో
నా పద్యాన్ని పదేపదే కెలుకుతున్నాడు

పిచ్చినా మై డియర్‌ కవీ..
ఇంక్‌ నెవర్‌ లైస్‌ రా!
ఎప్పుడైనా విన్నవా
దట్టమైన అడవిలో భీకరమైన వర్షం సౌండ్‌ని.... (XVIII-IX-XIII)

// నగరంలో కొన్ని నెత్తుటి గాట్లు//

గౌలిగూడ పరమేశ్వర డార్‌మెటరీ లాడ్జి
కిటికీలోంచి సారాయి స్వేచ్ఛాగానలహరి
జీరగొంతులో పోస్ట్ మాడ్రన్ అద్వైతం
*
ఫిలింనగర్‌ అద్దాల మేడలో ఒకానొక అందగత్తె
ఒలికిన మధుపాత్రను గతుకుతున్న శబ్దం
సిల్కు లాల్చీ చేతి కొసన
నలిగిపోయిన మల్లెదండ
లంగరుతో పడవ పెనుగులాట: కట్ అవే
**
ఉస్మానియా ఆసుపత్రి వరండాలో
ఉచ్చగత్తు వాసన
ముసిరిన ఈగల మధ్య మూర్ఛిల్లిన ముసల్ది
పక్కటెముకల్లో కట్టెలంటుకున్న వాసన
***
నాంపల్లి పబ్లిక్‌ గార్డెన్‌ చౌరస్తా
కరెంటు స్తంభం నీడలో
నెత్తురు చచ్చిన యువకుడు
ఎవడి చేతజిక్కి గంజాయి తాగెనో
****
పంజాగుట్ట ఫ్లయ్‌ ఓవర్‌ కింద
ఎండిపోయిన ఓ అమ్మ ఛాతీ
పురిటికందు నిద్దట్లోనే అన్వేషణ
బుక్కెడు పాలకోసం
తన్నుకులాడుతున్న పసికడుపు
*****
బిచ్చగాడిని నోటకరిచిన నిశిరాత్రిలో
నడిచినాకొద్దీ దారిపొడవునా
అవే నెత్తుటి గాట్లు

****** 22 రాత్రి 1.45

// వజ్రఖడ్గం//

గబ్బిలాల మీద పెన్ టార్చ్

లక్ష అగ్నిగోళాల పరావర్తనం

సర్క్యూట్లో పడి చచ్చింది గొర్రె

స్లమ్ ఏరియా కాకులు

మెన్షన్ హౌజ్ మీద లాండెడ్

పీకండిరా ఈకలు

లాగండిరా తోకలు

అనుపమ్‌ ఖేర్‌గాడు  

మటాష్ కొడుకు

చెవులకు చెప్పులు
తగిలించుకోండిక-
ఒకడి డ్రీంలో
వేరొకడి డిమాండ్:
మోడువారిన నేక్డ్ ట్రీ కి
పత్రదానం చేస్తే
వలువలు జార్చిన ఆకాశాన్ని
స్వప్నించమంటారేంట్రా

రక్తప్రసరణే లేని
చిమ్మచీకటి
మారుమూల
రసవిహీన
కృతహాస
మృతహాస
నిర్వేద లోయల
స్వీయ ఛాయ లేవీలేని
గొంతుకలంలో
మిస్సైళ్లు నింపితే
బ్రహ్మాండం బద్ధలైంది బాబయా
-ఇప్పుడా
అస్తకవి కోసం
ప్రాగ్దిశ వేణువు ఊదండి
వ్యవస్థ నిండా దుఃఖమే ఉంటే
ఇంకా షెహనాయ్
శ్రుతి చేసుకోవడాలెందుకు
అతడు రాత్రిళ్లు
ఖర్చుచేసిన క్షణాలను
గడియారంలోకి ఎక్కించండి
వజ్రఖడ్గంరా కవిత!

హలో.. దిసీజ్ మై విజిటింగ్ కార్డ్‌!

కొత్త పాస్‌వర్డ్

కొత్త డిక్షన్‌

వస్తువు చిత్రణలో 

స్పానిష్‌ పెయిటింగ్‌ 

అక్షాంశ రేఖాంశాల చట్రంలోంచి 

బయటపడ్డ సాల్వెడార్‌ శిల్పం

నడకల చుట్టూ ఆధీన రేఖలు మాయం

అయినా, 

జెండాలెత్తిన జెండర్లంతా
డిసెక్షన్‌ బాక్సులతో తయార్‌
ఆ సెక్షన్‌ వాళ్లంతా
సామూహిక దుఃఖితులేనంటావా
అయితే కానీ,
అర్ధ జాగృత విహంగులంతా
నిష్ఠూరపు సంస్మరణ సభలుపెట్టి
గుంపులు గుంపులుగా రోదించనీ
ఉర్రూతలూగించే
ప్రత్యామ్నాయ పరవళ్లను ఆపకు
పాండురోగుల కోసం
ప్రాచీన వాక్యాలెందుకు
పిడికిలి సడలితే
రాత్రిని ఏలుకోవడం కష్టం
సర్రయలిజం అంటేనే పచ్చి నిజమ్
అధివాస్తవికతలో జరా మరణ జమ్
కత్తిదూస్తే సిరాచుక్కలో
సునామీ చెలరేగాలి
హలో ..
దిసీజ్ మై విజిటింగ్ కార్డ్‌!

మీకో నగ్న సత్యం చెప్పనా..?

అల్ఫ్స్ పర్వతాల అంచుల్లో

లార్జ్ స్కేల్ షూటవుట్

ఫ్లెష్‌ ఆర్కిటెక్చర్‌

బాడీ ఆఫ్ ఇన్‌స్టాలేషన్

ఎస్కిమోల నరాల్లో ఉక్కపోత

ఏయ్‌.. నీపేరు

స్పెన్సర్‌ ట్యూనిక్‌ కదా!

 ---------------------------

న్యూడిజం అంటే...

నువ్వనుకున్నది కాదు తమ్మీ!?

Please use it sensibly!

బాడీ స్కల్‌ప్చర్‌లో

సోషల్ కాన్షియస్‌

మెక్సికో వీధుల్లో

నథింగ్ టు సీక్రెట్

కొన్ని కొలరాడోలు  

ఇంకొన్ని కిలిమంజారోలు  

ఇన్నర్‌ ఫ్రేగ్రెన్స్ వీచికలో

సింగిల్ లైన్‌ యవ్వన గీతం

ఇన్‌బిల్ట్‌ మెమొరీలో

పక్కకు జారిన పైటకొంగు

మౌంటెయిన్‌ మీద షిఫాన్‌ పరికిణి

కేన్స్ ఫెస్టివల్‌లో క్రష్డ్‌ ఫ్యాబ్రిక్‌

నయాగరా కింద బికినీ బాత్

లోటస్సరస్సు వొడ్డున

న్యూడ్ పిక్స్ గ్యాలరీ

వింటావా?

ద ఎటెర్నల్ నేక్‌డ్‌ ట్రూథ్‌

-----------------

మైండు దొబ్బిందా !

మూతికి మూడు కుట్లేసుకో

లేకుంటే,

నడ్డిమీద ముద్దెర్లేసి

పిరమిడ్‌ మధ్యలో నిలబెడతారు

అప్పుడు పాడుకుందువుగానీ-

నల్లాచీర నల్లారైక

నాలుగ్గొంటగా తానమా అని!!

ఇదండీ మన ఫ్యాషన్‌ !!

                            తమ్మీ నీకో నాగరికథ చెప్పనా

అనగనగా కొన్ని తుమ్మెద రెక్కలు
వాటి మీద లైట్ టచ్ ఆఫ్ క్లియర్ మస్కారా
నిరుడు కురిసిన బాసలేవని అడక్కు

రిప్ప్ డ్ జీన్స్ విత్ లేస్
చిరుగుల్లోంచి హైవోల్టేజీ గ్లామర్
జాలువారాల్సిన కుచ్చిళ్ల మీద
ప్రింటెడ్ జీన్స్ మొలిచింది

తమ్మీ దిసీజ్ స్లీవ్ లెస్ సీజన్
అనామికకు ఏమి తెలుసురా
కాళ్ల గజ్జెల గమ్మతి

చాక్లెట్ ఫేషియల్
వాటే డెలీషియస్ సీక్రెట్
బ్రాండ్ న్యూ ప్లేవర్
లాక్మే సెలూన్ బేసిన్‌లో
తెమడలు తెమడలు

పచ్చిపసుపు- శెనగ పిండి
యాక్ థూ:

హేర్ డ్యామేజీ కంట్రోల్ ఆల్ట్ డిలీట్!
రసం ఆఫ్ కుంకుడుకాయ షట్ డౌన్!!
రైస్ మేక్స్ యు ఫ్యాట్
ఫూడ్ హాబిట్ మీద ఫెమీనా కొత్త డెఫినిషన్
ఈటింగ్ కాన్సెప్ట్ మాడ్రేటెడ్
ముఫ్ఫిన్ తిని మూతి తుడుచుకోవడమే

శని ఆదివారాలు
మసక మసక చీకట్లు
అల్టిమేట్ ఎంటర్ టైన్
సలసల కాగుతున్న శరీరం

మధుపాత్రలో మెరుగైన సమాజం

కొట్టండిరా ఒరేయ్
గ్లాసులు పగిలేటట్లు బాదండిరా!!
 

ఇంకెందుకు రోజాపూలు

  

                                   

గుండే నిజమే

కత్తీ నిజమే

నెత్తురూ నిజమే

అయినా ఈ హత్యాకాండని

ప్రేమేనంటావా తమ్ముడూ..

తూనీగ తూనీగ పాటలోకి

లాటిన్‌ పదాలెలా దూరాయి

సుతిమెత్తని ఆమె కరచాలనం

ఊర్వశీ బార్‌ గిలాసలోకి

ఐసు ముక్కలా జారిందేమిటి?

చంద్రుడిలో ఉండే కుందేలు

ఎందుకిలా మట్టి దిబ్బలో పొర్లాడుతోంది!

లోకులు పలు కాకులు తమ్ముడూ

కేకుల్లా పొడుచుకు తిన్నారు!

ఆ నికృష్ఠుడొకడు..

జీవ పరిణామక్రమాన్ని తెలుసుకోమని

తీసుకెళ్లి రుష్యాశ్రమంలో

వదిలేసి వెళ్లాడు

దూరాన కొండమీద

ఉండుండీ మెరుపు  

అర్జునా ఫల్గుణా!!

ఎవడి దారిన వాడు వెళ్లిపోయాడు

ఇంకెందుకీ రోజాపూలు

ఆమె పొడవాటి జడపాయలు

ఎప్పుడో విడిపోయాయి

ఇప్పుడు చెప్పు తమ్ముడూ

దీన్నీ ప్రేమేనంటారా?

                                                      

//నా మరణవార్త //

కంటి కొసన నిప్పు రాజుకుంది
మంటల్లో కొన్ని స్వప్నాలు 
రెండు గ్లిజరిన్ చుక్కలుంటే 
ఒంపవా..
నా మరణవార్త నేనే చెప్పుకుని 
దుఃఖిస్తాను
స్వరపేటికలో 
నెత్తుటిపూల పాట 
నింపుకుంటాను
మృత్యోర్మా అమృతంగమయా!
నీ ఉంగరాల జుట్టుమీద
నాకింకా పిచ్చి పోలేదే..
మరిచిపోయావా..
హిమాయత్‌నగర్
స్ట్రీట్ నెంబర్ 5
పిక్ ఎన్ మూవ్ దగ్గర
వెనక్కి వెనక్కి తిరిగిన చూసిన
దృశ్యాలనేకనేకాలు
అప్పుడు నీ కళ్లలో పూసిన
డిసెంబర్ పూలు
ఇంకా పొరలు పొరలుగా 
నా గుండెలో నవ్వుతునే ఉన్నాయి
వెళ్లేవాళ్లు ఎంత నిర్దయగా పోతారో కదా
మంగళసూత్రాలు కళ్లకద్దుకుని
అందుకే:
మోహావేశ 
ప్రేమాక్రోశ 
దృక్కుల్లోంచి
బయటపడని పద్యాన్ని 
దోసెడు కాయితాలేసి 
తగలబెట్టాను
సమాధికింద 
బుట్టదాఖలైన 
ప్రేమలేఖలు
కొంచెం పక్కకి జరగవా
ముక్కు చీదుకుంటాను..

//ఆత్మకు అయిడెంటిటీ క్రైసిస్‌//

సముద్రాల్ని చిలుకుతున్నాను

కవిత్వం వెన్నలా కురుస్తోంది

మానస సరోవరం ఒడ్డున

మెరీనా బీచ్‌ పలవరింత

లైట్ హౌజ్‌లోంచి

ప్రాతఃకాల సంగీతం

గ్రామ్‌ఫోన్‌లో కాంపాక్ట్ డిస్క్‌

జలకన్య ఒంటినిండా

నక్షత్రాల నఖక్షతాలు

గాయాల మీద

చిటికెడు వెన్నెల మలాం

పొగడమీద రాలిన మంచు

రుధిరంతో కలిసిపోయింది

కలువ వలువ లోపలి నగ్నత్వం

మగత నిద్రలోకి  

తూరుపు కొండ ప్రసవించింది

వేకువ జామున

నా మరణానుభూతి

శూన్యాకాశంలోకి  

బాధాతప్త కవిత్వం

పాబ్లో నెరుడా కలంలోకి

ఇంకై ఇంకెన్‌ 

ఇప్పుడున్న బాధల్లా ఒకటే

ఆత్మకు అయిడెంటిటీ క్రైసిస్‌

ఏం పర్లేదు టచ్‌లో ఉండు

అందాకా ఈ భగవద్గీత చదువుకో!